ក្រុមហ៊ុន Tesla បាន​បង្ហាញរ៉ូបូតថ្មីរបស់ខ្លួន ដែលមានរូបរាងជាមនុស្ស និងមានសមត្ថភាព​ដើរបានយ៉ាងរលូន និងមានសមត្ថភាព​សម្គាល់វត្ថុ និងរើសចាប់កាន់វត្ថុ​ទៀងផង។ កាលពីឆ្នាំទៅ អំឡុងពេលព្រឹត្តិការណ៍ AI Day របស់ក្រុមហ៊ុន Tesla ក្រុមហ៊ុនបានធ្វើការបង្ហាញរ៉ូបូតប្រភេទនេះម្តងរួចហើយ តែនៅមានចំណុចខ្វះខាតច្រើន ព្រោះកាលនោះវាដើរមានភាពរអាក់រអួល និងមិនមានសមត្ថភាព​អាចចាប់កាន់វត្ថុនោះឡើយ។ ផ្អែកតាមការបង្ហាញថ្មីនេះ ក្រុមហ៊ុនបានធ្វើបច្ចុប្បន្នភាព​លើចំណុចសំខាន់ៗ រួមមាន ការបញ្ជារម៉ូទ័រ (Motor torque control) ការដើររុករក​និងសម្គាល់បរិស្ថានជុំវិញខ្លួន ការបង្រៀនឱ្យស្គាល់ពីចលនារបស់មនុស្ស (AI Training) និងការរៀបចំទុកដាក់វត្ថុដែលវាមើលឃើញនិងចាប់កាន់បាន។ នៅក្នុងការបង្ហាញថ្មីនេះ Tesla Bot មានសមត្ថភាពចាប់កាន់វត្ថុនិងប្តូរទីតាំងពីប្រអប់មួយ ទៅដាក់តម្រៀបនៅក្នុងប្រអប់មួយផ្សេងទៀត ដែលវាជាលទ្ធផល​នៃការសាកល្បងធ្វើត្រាប់តាមមនុស្ស។ គេបានរំពឹងថា ក្រុមហ៊ុនយក្សមួយនេះ នឹងអាចចាប់ផ្តើមការផលិត Tesla Bot ទាំងនេះជាផ្លូវការ និងដាក់លក់នៅលើទីផ្សារនាពេលដ៏ខ្លីខាងមុខ។

ប្រភពអត្ថបទ៖ www.theverge.com